Үш бидің әулиелігі

Бірде Қабылиса, Ескелді, Балпық үшеуі келе жатып, Ескелді Қабылисадан:

— Мен өлгенде қай жерге қойыламын? — дейді. Қабылиса:

— Сіз Үштөбе маңындағы Қызылжарға қойыласыз, — дейді.

— Балпық ше?

— Мұның жасы сенен кіші ғой, сенен сәл төменірек батысқа таман қойылар, — дейді.

— Өзіңіз ше?

— Мен Іле бойындағы Үшарал, Көкбастау жеріне қойылармын, — дейді. Ендігі жауапты Қабылиса алмақ болып, Айнабұлаққа жеткенде:

— Апыр-ай, мына жердің у-шуы-ай! Бұл қалай? — дейді Ескелдіге бұрылып. Ескелді:

— Бұл жерге жол түсіп, қала орнайды екен. Ант көп болады екен. Ерден әйел көбейіп, қырғынға ұшырайды екен, — дейді.

Дүнгенге келгенде Қабылиса Балпыққа қарап:

— Апыр-ай, мына жерден өкіргендей дауыс шығады ғой, бұл не? — дейді.

— Бұл жерге де қала түсіп, халық көбейіп, біртүрлі өнер шығып, елді айқайымен оятады екен, — дейді Балпық.