«Жас Алаш» газеті: Ғасырлық тарихы бар ұлттық мінбер

«Жас Алаш» - қазақ баспасөзі тарихындағы ең көне әрі ең ықпалды қоғамдық-саяси газеттердің бірі. 1921 жылдан бері жарық көріп келе жатқан басылым ұлт рухын көтеріп, қоғамдық ойды дамытуда, жастардың білімін жетілдіруде ерекше рөл атқарды. Бүгінде де газет тәуелсіз көзқарас пен ашық пікірталас алаңына айналып отыр.

Газет ең алғаш 1921 жылы Ташкентте «Жас қазақ» деген атпен басылып шықты. 1922 жылдан бастап «Жас Алаш» атауын алып, жаңа мазмұнмен жастар газеті ретінде жұмысын жалғастырды. Алғашқы жылдары газеттің басты миссиясы: қазақ жастарын ағарту, елдің сауаттылық деңгейін  көтеру, ұлттық мәдениет пен идеяларды насихаттау болды.

Кеңес дәуірінде де «Жас Алаш» қоғамдағы әділетсіздік, тіл мен мәдениет мәселелерін ашық көтере білді. Тәуелсіздік қарсаңында газет демократиялық қозғалыстар мен ұлттық жаңғыру идеялары туралы батыл мақалалар жариялады.Тәуелсіз Қазақстанда басылым аналитикалық материалдарға, саяси-әлеуметтік мәселелерді терең талдауға ерекше мән берді. Газет еліміздегі маңызды өзгерістер мен қоғамдық процестерді кәсіби тұрғыда саралап, үлкен аудитория сеніміне ие болды.

Қазіргі таңда газет талдамалық журналистикаға негізделген ашық пікір алаңы болып қалыптасты. Онлайн форматта өзекті жаңалықтар, авторлық колонкалар, әлеуметтік зерттеулер жарияланады.

«Жас Алаш» - ғасырлық тарихы бар ұлттық басылым. Ол әлі де қоғамдағы өзгерістерге сергек қарап, шындықты ту еткен ақпарат көзі ретінде миссиясын жалғастыруда.

Орындаған : Муратали Ардақ ҚазҰУ- дың 1 курс студенті.

Ғылым жетекшісі:фил.ғ.к., доцент Р.С.Жақсылықбаева.