Болашақ энергиясы.ЭКСПО 2017 көрмесінің нәтижелері.

ЭКСПО – 2017 – Қазақстанды әлемдік деңгейде танытқан, еліміздің инновациялық дамуына серпін берген тарихи жоба. «Болашақ энергиясы» тақырыбымен өткен халықаралық көрме 2017 жылдың 10 маусымы мен 10 қыркүйегі аралығында, барлығы 93 күн жұмыс істеді. Көрмеге 115 мемлекет пен 22 халықаралық ұйым қатысып, әлемнің түкпір-түкпірінен келген жаңа технологиялар мен ғылыми жобалар ұсынылды. Үш ай ішінде Астанаға 4 миллионнан астам адам келіп, бұл Қазақстан туризмінің өсуіне үлкен әсер етті.

Көрменің басты мақсаты – XXI ғасырдағы энергия мәселелеріне жауап беру, баламалы энергия көздерін кеңінен таныстыру және экологиялық мәдениетті арттыру болды. Осы мақсатта мемлекеттер күн, жел, су, биомасса энергиясын өндірудің жаңа әдістерін ұсынды. Жапондық сутегі энергетикасы, Германияның «жасыл қала» жобасы, Швейцарияның энергия тиімді үйлері, Кореяның интеллектуалды көлік жүйесі көрме көрермендерінің ерекше қызығушылығын тудырды.

ЭКСПО – 2017 Қазақстанды жаңа технологиялар мен жасыл энергетика бағытында халықаралық серіктес ретінде танытты. Бұл жоба елдің экономикалық дамуына, инновациялық орта қалыптастыруға және XXI ғасыр энергиясына көшу үдерісіне зор үлес қосты. Көрменің нәтижелері – тек өткеннің тарихы емес, болашаққа жол ашқан үлкен табыс.

«Journiverse» білім беру орталығының оқушысы: Серикова Аружан