6 наурыз – “Пионерская правда” газетінің алғашқы нөмірі жарық көрген күн

  1925  жылдың 6 наурызы – балалар журналистикасының тарихында ерекше орын алатын күн. Дәл осы күні алғашқы рет "Пионерская правда" газетінің алғашқы саны Мәскеу қаласында басылып шықты. Алғашқы нөмірі небәрі 20 мың дана болып жарияланғанымен, уақыт өте келе оның таралымы жыл сайын өсіп отырды. Бұл газет Кеңес Одағындағы балалар мен жасөспірімдерге арналған негізгі басылымдардың бірі болды.
  Газеттің басты мақсаты – жас ұрпақты білімге, еңбекке, достық пен патриоттыққа тәрбиелеу еді. Оның беттерінде мектеп өмірі, ғылым жаңалықтары, спорт, мәдениет және балалардың шығармашылық жұмыстары жиі жарияланып тұрды. Сонымен қатар оқушылардың хаттары, әңгімелері мен өлеңдері басылып, жас тілшілердің қалыптасуына үлкен мүмкіндік берілді. Уақыт өте келе Пионерская правда газеті танымалдыққа ие болды. 1975 жылы оның таралымы 9,5 миллион  данаға жетіп, ең көп оқылатын балалар газеттерінің біріне айналды. Газет аптасына бірнеше рет шығып, Кеңес Одағының көптеген аймақтарына таралды. Бұл басылымның беттерінде көптеген танымал жазушылар мен ақындардың шығармалары жарияланған. Олардың қатарында Максим Горький, Владимир Маяковский, Аркадий Гайдар, Самуил Маршак және Лев Кассиль сияқты белгілі қаламгерлер бар. Бұл жазушылар балаларға арналған әңгімелер, өлеңдер мен тәрбиелік мақалалар жазып, жас оқырмандардың әдебиетке деген қызығушылығын арттырды. 1991 жылы Кеңес Одағы  ыдырағаннан кейін газет бұрынғыдай пионер ұйымының ресми басылымы болудан қалды. Дегенмен Пионерская правда толық тоқтап қалған жоқ. Қазіргі таңда ол Ресейде балаларға арналған танымдық газет ретінде әлі де жарық көріп келеді. Әрине, оның таралымы бұрынғыдай миллиондаған дана болмаса да, балалар журналистикасының маңызды өкілдерінің бірі болып қала береді.
 Бүгінде Қазақстанда да балаларға арналған басылымдар бар. Соның ішінде ең танымалдарының бірі – Ұлан газеті. Бұл басылым мектеп оқушыларына арналған және онда оқушылардың шығармалары, мақалалары жарияланады. Сонымен қатар Дружные ребята газеті де балалар арасында танымал. Ол көбіне орыс тілінде шығып, мектеп өмірі мен балалардың қызығушылықтары туралы жазады. Ал кішкентай оқырмандарға арналған журналдардың ішінде Балдырған журналы ерекше орын алады. Бұл журнал ертегілер, өлеңдер және танымдық материалдар арқылы балалардың ой-өрісін кеңейтуге көмектеседі.
  Қорыта айтқанда, Пионерская правда – балалар журналистикасы тарихында маңызды рөл атқарған басылым. Ол бірнеше ұрпақтың білім алып, шығармашылыққа қызығуына ықпал етті. Бүгінде балаларға арналған газеттер мен журналдар бұрынғыдай көп болмаса да, олардың қоғамдағы маңызы әлі де жоғары. Өйткені балалар баспасөзі – жас ұрпақтың дүниетанымын қалыптастырып, олардың білімге деген қызығушылығын арттыратын маңызды құрал.