Жетістікке жетелейтін кітап әлемі - Салеми Ұлмекен 

      Қазіргі қоғамда адамның дамуы, мақсат қоюы және өзін-өзі жетілдіруі ерекше маңызға ие. Мамандардың айтуынша, адамның күнделікті қабылдайтын ақпараты оның ойлау жүйесіне тікелей әсер етеді. Осы тұрғыдан алғанда, мотивациялық кітаптар адамның көзқарасын өзгертіп, өзіне деген сенімін арттыруға ықпал етеді. Соңғы жылдары қазақ тіліндегі мотивациялық әдебиеттерге деген қызығушылықтың артуы осының дәлелі.

Алғашқы еңбек – Екінші болма. Кітап авторы – Қуаныш Шонбай. Бұл туынды 2018 жылы Алматы қаласында жарық көрген. Шамамен 240 беттен тұратын кітапта автор табысқа жету жолындағы тәртіп, еңбекқорлық және нақты мақсат қоюдың маңызын түсіндіреді. Өмірлік мысалдар арқылы оқырманды үнемі алға ұмтылуға, өз мүмкіндігін толық пайдалануға шақырады.

Келесі кітап – Ойыңды өзгертіп, өміріңді өзгерт. Оның авторы – психолог Кәмшат Бекжігітова. Кітап 2017 жылы Алматы қаласында жарық көрген. Шамамен 180 беттен тұратын бұл еңбекте адамның ойлау жүйесі мен өмір сапасы арасындағы байланыс қарастырылады. Автор өз тәжірибесіне сүйене отырып, қиындықтарды еңсеру жолдарын көрсетіп, позитивті ойлаудың маңызын айқындайды.

Үшінші кітап – Қош бол, қиындық. Бұл шығармада қиындықтарды жеңу, мотивацияны сақтау және өмірге оң көзқараспен қарау тақырыптары қозғалады. Кітаптың әртүрлі басылымдары болғанымен, соңғы жылдары қазақ оқырмандары арасында кең таралған мотивациялық еңбектердің бірі ретінде танылды. Онда қиындықты кедергі емес, даму мүмкіндігі ретінде қабылдау идеясы ұсынылады.

Мотивациялық кітаптар – тек оқуға арналған мәтін ғана емес, адамның ойлауын өзгертіп, өмірге деген көзқарасын қалыптастыратын құрал. Мұндай еңбектер арқылы әр адам өз мүмкіндігін қайта бағалап, жаңа мақсаттарға ұмтыла алады.

«Journiverse» білім беру орталығының оқушысы: Салеми Ұлмекен