Қазақстан — төрт мезгіл симфониясы - Бекейқызы Ақмарал 

    Баршаға мәлім, тек қоңыржай белдеуде ғана жылдың төрт мезгілі толық ауысып отырады. Ал қай мемлекетте бұл маусымдар ең әдемі, ең әсерлі және ең нақты өтеді? Ол, әрине — Қазақстан. Орталық Азияның жүрегінде, Еуразияның кіндігінде орналасқан Қазақстанның климаты шұғыл континентті болғандықтан, мұнда жыл мезгілдерінің алмасуы өте айқын сезіледі. Жалпы ел бойынша жылдық орташа температура шамамен +5,5°C деңгейінде, ал жылдық жауын-шашын мөлшері 250–300 мм аралығында болады.

   Қыс мезгілінде (желтоқсан–ақпан) орташа температура -12°C пен -15°C аралығын құрайды. Бұл кезең тұрақты қар жамылғысымен, қаһарлы аяздармен және жиі болатын борандармен сипатталады. Жауын-шашын мөлшері төмен және негізінен қар түрінде түседі. Көктем мезгілі (наурыз–мамыр) ауа райының құбылмалылығымен ерекшеленеді. Орташа температура +5°C-тан +12°C-қа дейін көтеріледі. Бұл уақытта қар жедел еріп, жауын-шашын мөлшері орташа деңгейге жетеді.

    Жаз мезгілі (маусым–тамыз) ыстық әрі құрғақ болады. Орташа температура +20°C пен +25°C аралығында сақталғанымен, оңтүстік өңірлерде бұл көрсеткіш әлдеқайда жоғары. Бұл — күннің ең ұзақ, ал жауын-шашынның ең аз болатын кезеңі. Күз мезгілінде (қыркүйек–қараша) температура күрт төмендеп, орташа есеппен +2°C пен +8°C аралығын көрсетеді. Алғашқы аяздар басталып, табиғат «алтын» түске бөленетін жапырақ түсу процесі жүреді. Осылайша, Қазақстан — әлем картасындағы төрт мезгілдің нағыз «симфониясы» орындалатын сирек мекеннің бірі. Ақ қыраулы қыс пен алтын күз, жаймашуақ көктем мен аптап жаз бір-бірімен үйлесім тапқан бұл жерде табиғаттың нағыз ырғағын сезінуге болады. Біздің климатымыз қатал болғанымен, ол әр мезгілдің қадірін түсінуге үйретеді.

«Journiverse» білім беру орталығының оқушысы: Бекейқызы Ақмарал