АТТЕСТАТ – АРМАНҒА БАСТАР АҚ ЖОЛ

– Балалық шақтың соңғы қоңырауы соғылды...

Бұл – жай ғана сөйлем емес. Бұл – он бір жыл бойы бір партада отырып, бір сыныпта күліп, бірге армандаған түлектердің жүрегіндегі сезім.

Алматы қаласындағы №172 мектеп-гимназиясында өткен аттестат табыстау салтанаты дәл осындай ерекше көңіл күйге толы болды. Бұл кеш мектеп бітіру рәсімі ғана емес, балалық шақпен қоштасып, болашаққа бағыталған жастардың өміріндегі жаңа белестің бастауы еді.

Мерекелік салтанатта ерекше толқу сезілді. Бір бұрышта қуаныштан жүздері бал-бұл жанған түлектер, екінші жақта балаларына мақтанышпен қарап тұрған ата-аналар, ал сахна төрінде әр шәкіртінің жетістігін өз жетістігіндей қабылдайтын ұстаздар...

Осы көріністің өзі мектептің жай ғана білім ордасы емес, үлкен өмірге жол ашатын қасиетті мекен екенін аңғартты.

Салтанатты жиында мектеп директоры Чорманова Әлия апай түлектерге жүрек жарды  тілегін арнап, алған білімдерін ел игілігіне жұмсайтын, адал әрі жауапты азамат болуға шақырды. Оның әр сөзі жас түлектерге сенім мен жігер сыйлағандай әсер қалдырды.

Мектеп өмірінде оқушыға ең жақын жанның бірі – сынып жетекшісі.

11 «В» сыныбының жетекшісі Бесирова Мира апай шәкірттері туралы тебірене сөйлеп, олардың мектеп қабырғасындағы өсу жолын еске алды. Ұстаздың әр сөзі оқушылардың жүрегіне жетіп, көпшіліктің көзінен қуаныш пен қимастықтың жасын көруге болатын еді.

Кештің ең әсерлі сәті – көптен күткен аттестаттың табысталуы болды.

Түлектерге аттестатты Анар Сәкенқызы салтанатты түрде табыс етті.

Сол сәтте әрбір оқушының жанарында сан түрлі сезім қатар тұрды. Біреу үшін бұл – балалық шақтың соңғы парағы болса, енді біреу үшін көптен күткен арманына бастар алғашқы баспалдақ еді.

Аттестат – жай ғана қағаз емес.

Ол – алғашқы әріптен басталған ұзақ жолдың нәтижесі.

Ол – ұстаздың маңдай тері.

Ол – ата-ананың ақ тілегі.

Ол – оқушының он бір жылдық еңбегінің жемісі.

Салтанатты кеш барысында түлектер ұстаздарына алғыстарын айтып, ата-аналарына тағзым етті. Естелік әндер шырқалып, балалық шақтың ең жарқын сәттері бейнеролик арқылы қайта жаңғырды. Кеше ғана мектеп табалдырығын имене аттаған бүлдіршіндердің бүгін үлкен өмірге қанат қағып тұрғанын көргенде, уақыттың қаншалықты жүйрік екеніне тағы бір мәрте көз жеткіздік.

Бұл кеште мен тек аттестат табыстау рәсімін ғана көрген жоқпын.

Мен ұстаздың шәкіртіне деген шексіз сенімін көрдім.

Мен ата-ананың баласына деген мақтанышын көрдім.

Мен түлектердің көзіндегі болашаққа деген үмітті көрдім.

Журналистикада «жақсы мақала – адамның жүрегіне жеткен мақала» деген қағида бар.

Осы кештен кейін мен журналист болудың мәнін бұрынғыдан да тереңірек түсіндім. Журналист – оқиғаны ғана емес, сол оқиғаның ішіндегі адам тағдырын, сезімін, қоғам үшін маңызын көрсете алатын тұлға.

Бір қарағанда бұл қарапайым мектеп кеші сияқты көрінуі мүмкін. Алайда дәл осындай сәттер мыңдаған жастың тағдырын айқындайды. Бүгін аттестат алған түлектердің арасында болашақ дәрігер де, инженер де, ұстаз да, кәсіпкер де, мүмкін болашақ әріптесім – журналист те бар.

Сол себепті бұл кеш мен үшін жай ғана мерекелік іс-шара емес, жаңа өмірдің басталуын бейнелейтін маңызды оқиға болды.

Ұлы ұстаз Ахмет Байтұрсынұлы: «Білімді болуға – оқу керек, бай болуға – кәсіп керек, күшті болуға – бірлік керек» деген екен.

Меніңше, осы кеште түлектер біліммен қатар, ұстаздарының тәлімін, ата-анасының ақ батасын және туған мектебінің рухын да өздерімен бірге үлкен өмірге алып шықты.

Ал журналист ретінде дәл осындай сәттердің шынайы құндылығын қоғамға жеткізу – менің болашақтағы басты міндетім деп есептеймін.