Тәжік әке, сен үшін

Сыр бойында, жағада,
Ағынға көп қарадым,
Толқын сөйлеп, аға ма,
Көкке түйіп қабағын.
Аққандай бір ызамен,
Толқын тулап кетеді.
Шуылдаған cap өзен,
Шұғыл қайда жетеді?
Есімде сол жағадан,
Ағылғандай өзеннен
Ашуы сел көп адам,
Мылтықтарын кезенген,
Саппен сонау соғысқа,
Ағылғаны толқындай,
Күн батысқа сол қыста
Толқындаған ел тынбай...
Жағада сол, есімде,—
Отырған шақ хат жазып.
Суық қыстың кешінде,
Қасымда бір қарт тәжік,
Сұр толқынға қараған,
Қалың қасы қозғалып.
Бейхабар солдат — балада
Естімей бір сөзді анық...
Қазақ та төмен жақтағы,
Сақалына жас тамған.
Сол кеш ұлын жоқтады,
Сырдан жыры басталған.
Қарадым сол өзенге,
Кегін іздеп әкенің,
Кездім сол бір кезеңде,
Қарт тәжіктің мекенін.
Есімде қыс қаһары,
Есімде сол қария.
Ленинабад шаһары,
Аққан шулы дария.
Кеттім мен де майданға,
Ұқсап қарттың ұлына.
Қар қанатын жайғанда
Сырдария суына.
Келем, міне, тағы да,
Cay ма екен, сол ақсақал?
Қайтты ма ұлы бағына,
Сәтті болып ақ сапар?
Уыстайын, сағындым,
Ұратөбе жемісін.
Жырлайын дос бағының
Рақаты мен жеңісін...

---