Жас алғысы

Ерке өскен еркін елде мен бір жаспын,
Туғаннан тың ғасырмен мен сырласпын.
Ер жеттім толқынды өмір арасында —
Сондықтан менің жырым — өрен тасқын.
Еркінмін бұлтты жарып, көкке ұшамын,
Бұзамын мұхиттың да мұз құрсауын.
Еркінмін ерлікке де, білімге де,
Әлемде қызық менің, жастық шағым...
Гүл, орман Отанымда шаттық өмір,
Теңіздей көтерілген шалқып көңіл.
Сайраған бұлбұлдары сол орманның,
Жан-жақтан жастық жыры толқындап тұр.
Шырқаймын мен де бірге шаттық сырын,
Жырыммен жаңғыртамын таудың шыңын.
Иесі бұл шаттықтың партияға —
Арнаймын жалындаған жанның жырын!

---