Қаракөз қыздар

Қаракөз қыздар, жан қыздар,
Қаракөз қыздар — балдыздар.
Көптігің көкте — жұлдыздар,
Жар дегенде — жалғыздар!
Жиналармысың мұншама,
Жырға да құмар — бәріңсің!
Өртерсің, көзің жұмсама,
Бәрің де бір-бір жалынсың!
Не деген өткір жанарың,
Қандай бір оттан жетілді?!
Махаббат деген қаланың
Терезелері секілді.
Бақытты қыздар, бал қыздар —
Аяулы бақтың алмасы!
Жырымды ғана ал, қыздар,
Өзіме қолқа салмашы!
Онсыз да амал құрып тек,
Барамын серттен қайта алмай!
Сүйемін деп те айта алмай,
Сүймеймін деп те айта алмай!

---