Ән-тәбәрік

Астана туралы ән
(Еленаның әні)

Нәр алып ұлпа қардан,
Гүл өрді қырқалардан.
Сарыарқам — сағынышсың,
Көзімді қымтап алған.
Шырқаудан шырқаларда ән,
Көркіңе мін таға алман.
Ақ Есіл — ақ білектей,
Ай — тарақ,
Түн таранған.
Қайырмасы:
Астанам, Ордасы бол,
Татулық, тыныштықтың.
Пәк сапар — жол басы бол,
Таусылмас ырыс-құттың.
Алам деп өмірге азық,
Айналам Астанамнан.
Сен боп қал Темірқазық —
Болашақ бастау алған.
Өтсек те мың сындардан,
Ассақ та кіл шындардан;
Үкілеп Үмітімді —
Тау талып, күрсінді орман. 
Күн бұлтқа тығылардай
Көркіңнен қымсынғаннан.
Астанам — Құбыламдай,
Кеудемнен бүршік жарған!..
Қайырмасы.
Ақ Үміт! —
Әр жүрекке,
Жет — мұңнан айықтырып.
"Өткізем арғы бетке
Сырғамды қайық қылып".
Сүйемін Жан-Елімді,
Атқанша Тылсым Ақ Таң —
Жеткізер сәлемімді
Жұлдыз ән сыңсып аққан!..
Қайырмасы.

---