Ғайып - ғашық

Нұр болып енесің,
Көрінсе Елесің —
Түсемін патшалық тағымнан.
Жүректі оқ табар,
Жаныма от тамар —
Көзінде мөлт еткен Лағылдан.
Алыстап арамыз,
Қол бұлғап қаламыз. —
Жанбысың жаралған Сағымнан?..
Жапанда жалғыз тал
Бұлбұлға салғызды Ән. —
Ол — менмін өзіңді сағынған.
Қайырмасы:
Шақтарда наладан айыққан,
Сен пайда боласың ғайыптан.
Тәтті Елесің —
Тербейді Арманның Ақ Кемесін!
Басылмай Аңсарым,
Төгіліп моншағым—
Араны әніммен жалғаймын.
Бұйырмас бақытым,
Шыға алмас Тақытым! —
Сыйладың сен маған Балдай Мұң.
Қарсы алып тандарды,
Арқалап арманды
Ақ балғын білегі талды Айдың.
Көзімнен ағатын,
Таңдайға таматын
Жұлдызды ғана мен талмаймын...
Қайырмасы.