Алыста сенің тұрағың

Алыста сенің тұрағың,
Көрмедем, қалқам, көп айлар.
Жайқалтып жасыл құрағын,
Жапырақ жайды тоғайлар.
Бақшаға барсаң бірауық,
Қадалар, сірә, көп көздер.
Кейінің көңлі шын ауып,
Айтылар, мүмкін, от сөздер.
Табиғат заңы ол да бір,
Қадалса көздер, несі бар?
Сағынған сені сонда бір,
Сәулешім, мені есіңе ал.
Қадалған жанға көз ілмей,
Қадала бермей, қал, деші.
Оқуда жүрген өзіңдей
Аңсаған жарым бар деші.