Алтаудай Алашпын!

Әлиханмын, Жүсіпбекпін қаны бір,
Дес бермейтін сескенбейтін жаны дүр.
Көзімізді жойса дағы мылтықпен,
Сөзімізді жоя алмады бәрібір.

Жаһаншаһпын жұртым үшін жақ аштым,
Жақыным деп әр қазаққа қарастым.
Мәскеуді де дүрілдеткен атағы,
Алтын медаль алған алғыр Алашпын.

Мен Нәзірмін мықтылармен таластым,
Елші атанып өз елімнен әрі астым.
Білімімнің арқасында бір кезде
Арабты да мойындатқан Алашпын.

Шәкәріммін тура айтатын датымды,
Болашаққа сөз қалдырған татымды.
Шыңырауға тастап өшіре алмады,
Алашыма деген махаббатымды.

Сұлтанмахмұт, Міржақыппын, Ғұмармын,
Ұлтым үшін ұмытылмас ұланмын.
Көптің көзін ашамын деп көкке ұшып,
Күнге қарай қанат қаққан қыранмын.

Ұлтын, дінін, тілін шексіз сүйетін,
Дүние емес ұрпақ үшін күйетін.
Аласармас Алатаудай Алашпын,
Қазағыма ғана басын иетін!

---