Қазақ тілім – Досхан Ахметқалиев

Қасиетіңнен айналдым, қазақ тілім,
Таниды сен болмасаң қазақты кім?
Тәуелсіздік таңымен қатар келді,
Өз тілімде сөйлейтін азатты күн
•••
Сен - менің елдігімдің айғағысың,
Жұртымның жыры менен қайғы әнісің.
Жетпіс жылда жымысқы саясатпен,
Шұбар сөздер ішіңді жайлады шын...
•••
Бұл тілдің өстім сусап ән-күйімен,
Тәлім алып анамның әлдиімен.
Тілді ұмытқан адамды көрген кезде,
Тітіркеніп кетеді жан дүнием...
•••
Ұлт та жоқ, тілді естен шығарғасын,
Білемін, бәрі мұны ұға алмасын.
Бұл тілмен шайқап өтіп Шекспирді,
Мұхтар атам жазды "Абай" шығармасын..!
•••
Жаттап өсіп Шәкәрім өлеңдерін,
Көрмедім еш, тілімнің көнергенін.
Бұл тілде ән шырқаған Әміренің,
Білеміз қошеметке бөленгенін..!
•••
Бұл тілде ғасырлардың жыры жатыр,
Салт-дәстүр, әдебімнің сыры жатыр.
Бұл тілде еш байлыққа тең келмейтін,
Қазағымның ортаймас құны жатыр..!
•••
Ойға алып, Ана тілді, бәсі биік
Толқимын, жанарыма жас үйіліп
Анасын құрметтеген әрбір адам,
Тілді де сүю керек, басын иіп..!