Біз шын сүйдік – Nurbek9523

Біз шын сүйдік

Біз ұрсыстық...
"Көзбенен"
Үндемедік.
Ауыр сөзбен ғайбаттап тілдемедік.
Ауыздан шыққан сөздің өмір бойы,
Қадаларын   жүрекке   білген   едік.

Біз сағындық...
Оны айтып жарылмадық,
Күн сайын жанымыздан табылмадық.
Күшейген  күнен   күнге  сағынышты,
Нығайған махаббат деп қабылдадық.

Біз ынтықтық...
Қадірдің биіктігін ұсақтамай,
Жүргенбіз сезімді асау тұсап қалай?
Бір аттам жерде тұрып бата алмадық,
Қиялда құшақтастық … "құшақтамай"

Біз шын сүйдік...
Ерінмен сүйіспедік.
Ақ  ардан  аттамауға  тиісті  едік.
Шүкір етіп көргенге нұрлы жүзін,
Қара  шаштан  жай ғана иіскедік.
...Тиіспедік...

Авторы: Нұрбек Бекұлы