Көзілдірік – Nurbek9523

Көзілдірік

Көтересің көңілді өзің күліп,
Береке кіргізеді төзімділік.
Қалай көрсең —
дәл солай көрсетеді,
Өмір деген - саналы көзілдірік.

Тағдыр саған ұсынды өз үлгісін,
Әрбір сәтін өмірдің сезін түсін.
Өмір күрес , күресе білу ерлік,
Аянба ешқашанда өзің үшін.

Сыбағасы тиеді таласқанға,
Есігін оңайлықпен бақ ашқанба?
Көзді жұмсаң күндізде қара аспан,
Көзді ашсаң ақ екен қара аспанда.

Бағалау құт қолдағы қазіргіні,
Өлшеуі жоқ биіктік қадір құны.
Өз қадірің үнемі өз қолыңда,
Алла өзі қолдайды сабырлыны.

Жетеді жеңістерге күле білген,
Табанды тау арманға тіре бірден,
Мына әлем тамаша шын мәнінде,
Айналаңа қарасаң жүрегіңмен.

Сынаққа үзілмейді төзімді үміт,
Көтереді қайғыны көзің күліп.
"Алдамайды армандар"
Сене білсең...
Кірлемесе жүректегі көзілдірік.

Авторы: Нұрбек Бекұлы