Күн де ашылды, мен де ашылдым

Күн де ашылды, мен де ашылдым,
Шаңы кетті сан ғасырдың.
Жүрегімді аймалады,
Жапырақтай жап-жасыл мұң.

Менің демім тамшыда бар,
Талға тамған, сансыз олар.
Күйбеңінен қу тірліктің,
Сол тамшылар аршып алар.

Жасыл өлең, жасыл жарық,
Түу сыртымда ғасыр қалып.
Жұбатады сол тамшылар,
Көз алдымда асыр салып.

Мұңайдым ба озғасын Күн,
Бұл жанымды қозғасын кім?!
Дәмі қалар тамшыларда,
Менің жасыл көз жасымның…