Көрнекті – Марфуға Бектемірова

Ұмытқан жоқ ем,
Аралап жүріп жер-көкті,
Жылдарым өтті,
Кеудемнен ызғар жел де өтті.
Ұмыттың мені,
Ұмыттың мені, амал не,
Жырыма сені бөлеп ем,
Қайран Көрнекті!
Сағынышқа толы,
Шілденің күні шөлдетті,
Балауса күнім,
Балалық шағым сенде өтті.
Дәл мендей енді туатын мына ғасырда,
Жырлайтын ақын бар ма екен сені,
Көрнекті?!

* * *

Тағы бір ақын туар ма Көрнектімде,
Менен соң келер екен кезек кімге?
Өлеңім-рухым, тілім, мен оларсыз,
Өзімнің Отаныма керекпін бе?
Хабарын күткен сәтте күрең желден,
Құр тастан не пайда бар шіренгенмен?
Ұясын таба алмайды кейбір құстар,
Ұшырып кең аспанға жібергенмен.