Каспий – Сайлаухан Нәкенов

Каспий, Каспий,
Бетiң толқын, толқын сенiң әрi астың,
Келмейдi ғой
Ойынқұмар толқыныңмен таласқым.
Айтшы маған,
Мына тұрған жағаңдағы жартаста
Табанының iзi бар ма
Ұлы ақын Тарастың?
Өстi ме әлде
Осы жерде тамыр жайып жыр-бұтақ,
Бәсе, солай,
Жағалауың өлең болып тұр тұтап.
О, қарт Каспий,
Қойынында талантынан Тарастың
Туып қалған шығар, бәлкiм,
Теңiз жайлы бiр кiтап.
Сөйле, Каспий,
Тыным бермей жатыр ма әлде шу саған?
Жаңағы бiр тентек толқын
Секiлдi ғой жусаған...
О, Каспийiм,
Композитор болар едi-ау керемет,
Өзiңдей боп
Мың бiр үнмен тебiренiп туса адам.