Сыртқы көзге сұлу болып көрінген – Келіс Рахымжанов

Сыртқы көзге сұлу болып көрінген
Шалқып күлген топ ішінде мен жоқпын.
Көңіліңнің орын іздеп төрінен
Ұнау үшін барды салып көрмеппін.

Қаражаяу, сол қоңырқай қалпымда
Патша көңілім санамай-ақ өзін зор.
Неменеге қарайлайды артына
Жұрт білмесе қалатындай болып қор.

Басқа жұрттың не ісі бар біздерде
Сенің қымбат көз алдымда жүргенің.
Көрсем-дағы көрмеген боп жүргенде
Саған солай ұнайтынын білгемін.

Бөтен көзге көрінбейтін қараса
Бар құпия тек екеуміз білетін.
Өзің жоқ боп қалған сәтте оңаша
Ойларым бар сен деп толғап жүретін.