Бәсіре – Әділбек Ыбырайымұлы

Өмір біздің ойлағаннан басқарақ,
Көңіл кейде қасқырдан да ашқарақ.
Адамдардың бәрі бірдей бақытты,
Тек бақытсыз: сыр алдырар қас-қабақ.
Күрсінесің дидарына бір қарап,
Мұң жатады жанарында бір қабат.
Уақыт шіркін, бейапарсыз диюана,
Біртін-біртін нәрін … бәрін ұрламақ.
Кете барар бар жақсылық жылыстап,
Тұрар дейсің уысында кім ұстап?
Асыл сезім айналады жасыққа,
Ыстық жүрек өрекпіген суыспақ.
Неткен жалған дүние бұл – әсіре,
Тірлігіңнің түйінделер бәсі не?
Бұлғақтаған сұлуға да, байға да,
Түбі әйтеуір бір уайым – бәсіре.
Шын баянды болатынын қандай құт?
Біле алмадық.
Ештемеде қалмайды ұқ.
Жапа-жалғыз өзің ғана қаласың,
«Бәсіреңді» басыңа үйіп таудай ғып …