Тездетіп жігіт күнім өтіп кеттің – Базар Оңдасұлы

Бұл бетте «Тездетіп жігіт күнім өтіп кеттің» атты Базар Оңдасұлы жазған өлеңнің мәтіні толық жарияланған.

  • 12.11.2015
  • 0
  • 0
  • 3960
Дүние, әттең әуре еттің мені,
Көп қудым әуре болып залым сені.
Бір күні санды соғып, «аһ» ұрамын,
Көшкен соң жігіттікің керуені.
Көшкен соң керуені жігіттікің,
Жігітке пайдасы жоқ көп біліктің.
Тұсынан қызды ауылдың өлеңдетіп,
Жош етіп, қызыл тілім, сен желіктің.
Жош етіп сен желіктің, қызыл тілім,
Жігітке пайдасы жоқ асқан білім.
Жапанда ақ киіктің сүргініндей,
Тездетіп кеттің өтіп, есіл күнім.
Тездетіп, есіл күнім, өтіп кеттің,
Сен шіркін, бізден өтіп кімге жеттің?
«Мен сенен айырылмайтын!» дейтін едің,
Опасы жоқ екен ғой айтқан серттің.


Пікірлер (0)

Пікір қалдырыңыз

Осы автордың басқа өлеңдері