Бір мұңыма ұласады бір мұңым

(ҮІ)
Бір мұңыма ұласады бір мұңым,
Күйін кешіп жүрген жанмын жындының.
Сезім деген оп-оңай-ақ болса ғой,
Көрсететін киносындай үндінің.

Сан қиындық көрседағы жолында,
Мәз-майрам боп қосылатын соңында.
Кинодағы бақытты ғой ғашықтар,
Армандары - режисердің қолында.

Сені сүйіп, ғашық болып қалғаным,
(Аңсауменен таңды таңға жалғадым).
Әттең біздің тағдырымыз лента емес,
Лауһылында жазулы тұр Алланың.

Бұл өмірдің шеңберінен шығайын,
Періштем-ау, басқа мендік уайым.
Шексіздікте табысамыз сеземін...
...Солай деші, ей, режисер - Құдайым!

05.06.16

---