Ұлттық сезім – Aldongarova

Елім менің ұлы отаным өз елім,
Өн бойыңды от жырыммен кеземін.
Жүрегімнен шығып жатыр жауһар жыр,
Жүрегіммен сені жақсы көремін!

Ұлан ғайыр жеріңменен танылған,
Сезім тұнған қаны бірге бауырдан.
Елім менің алтын ордам отаным,
Бір өзіңе таудай сезім ағылған.

Тауың қандай сағындырар дауылың,
Ыстық маған әрбір жарқын ауылың.
Баурайыңнан соғатын сал самалың,
Ұлы отаным ыстық сайран сауығым!

Кіндік қаным тамған өлке, тамған маң,
Жырым осы жүрегімнен арнаған.
Асқар тауым Қазақстан мекенім,
Мәңгілік ел тілейтінім Алладан!

Мұнай толы байлығың бар бақытым,
Өзіңменен өтер алтын уақытым.
Өр өлкеге өшпес өлең арнауға,
Жүрегімнен келіп жатыр шабытым!

Биік болсын барша елден байрағың,
Қора толы мал ырысты жайлауың.
Елім менің қасиетті қазағым,
Менің мына өмірдегі байлығым!

Сенсің менің тазалығым, тұнығым,
Сенсіз менің үзіледі үмітім,
Сен бар жерде жыр тұнады көңілге,
Сен бар кезде құлшынамын өмірге.

Тау көгіңде самғап биік қыраның,
Ерлік жайлы шырқалады жыр әнім.
Қазақстан менің жақұт мекенім,
Ерлік жайлы шырқалады ұраным!

Достықты әркез биік ұстап мақсаттан,
Жаңылмаған менің елім жақсы аттан.
Әлия Маншүк қорғап өткен нар елім,
Қас жауының қос аяғын ақсатқан!

Көлдерімен теңіздері көз тоймас,
Қазы қарта жал жаясы болған ас.
Жүрегімде сақталады мәңгілік,
Менің қайран қазағымдай ел болмас!