Махаббат

Махаббатқа ежелден жүрмейді есеп,
Ерік берсек есепке, гулейді өсек.
Артық сөйлеп, асығыс айтқанымыз,
Сүю менен үйлену бірдей десек.
Махаббаттың у-зəрі балдан шырын.
Өле-өлгенше білмейсің жалған, шынын.
Жел үйірген етегін жеңілтектер,
Жетегінде кетеді алдамшының...
Бойжеткеннің бозарып жібек өңі,
Тұңғиыққа тағдыры тіреледі.
Он күн дұға, жүз күн жыр оқысаң да,
Оңайлықпен табылмас жүрек емі.
Махаббатқа жүрмейді тіл өнері,
Көксегені,
Өзге оның тілегені.
Қыздың қырық құбылған мінез-құлқы,
Жігіттерді жынды ғып жібереді!
Махаббатқа жүрмейді ақыл, кеңес,
Алыс та емес,
ол саған жақын да емес.
Аузы күйген ас-суын үрлеп ішер –
Бұл сөзімді, айтшы, кім мақұл демес?!
Махаббаттың бар, жаным, мың қатпары.
Ол – сезімнің сəбиі құндақтағы.
Адамдардың өзіне байланысты
Арзандауы, немесе қымбаттауы.

---