Екпін

Октябрьдің екпіні
Солқылдатып соққанда,
Қазандағы дауылдан
Қара бұлтты қақ жарған,
Нажағайдың оғындай,
Қараңғыны жарық қып,
Әлемнің жалғыз шамындай.

* * *

Жұмыскер еңбегіне сенетұғын,
Бірлікпен қиындықты жеңетұғын,
Айнымас алып күштің арқасында
Құлпыртып тұрмысқа гүл егетұғын.
Шегі жоқ Қазақстан табысының,
Екпіні жерді жарды дабысының,
Түрксиб алты айлықты алты-ақ басып,
Көрсетті күшті екенін шабысының.
Күннен-күнге құлпырып,
Жаңа өмірге ұмтылып,
Өскен елім гүлденіп.
Қоңырат, ұлы Балқаш кен саласы,
Мыс қайнап, алтын төккен ен даласы.
Кеулеген тас көмір мен тау сағызы,
Қарқында социализм мол аясы.

* * *

Алтын Отан гүл киген,
Сүйемін сені, сүйеді ел.
Тарихта жалғыз жасты иген,
Сырыңды жайды жібек жел.
Сенің сырың күн сыры,
Марсқа барсам,- жол ашық,
Әлемнің асар қай ері,-
Ерлеріме күн ғашық.

---