Автопортрет

Көкейімде – мың арман,
Көкірегімде – Шырағдан.
Тағдырыма тəнтімін
Жоқтан-бардан құралған.
Жоқ демеймін, бар деймін:
«Су ішемін, қар жеймін»
Түрлі-түсті бояумен
Арманымды əрлеймін.
Ел жайлауға көшкенде,
Ой бағамын төскейде.
Қиялымды тұсаулап
Көрген емес еш пенде!
Күн нұрынан жаралдым,
Таң нұрымен таралдым.
Аңыз бенен Ақиқат –
Қос анары анамның.
Желмен бірге есемін,
Бұлтпен бірге көшемін.
Мынау байтақ, ұлы өлке –
Өз үй, өлең төсегім!
Қауметі үшін аз күннің,
Қай пендені жазғырдым?
Көп ішінде – жалғызбын,
Жалқы ішінде – Мəжнүнмін.
Мəжнүндіктің азабын
Жеткізе алса ғазалым:
Пенде алдында адалмын,
Алла алдында тазамын.

---