Өлең, жыр, ақындар

Баспагерге базына

  • 22.07.2021
  • 0
  • 0
  • 439
Дейсің-ау: «Өлең – шығын,
өлең – шығын»
Осы ма өзекжарды өрең, шының?
Көзіме елестеді,
Сені көріп,
Ызыңдап құлақ-миды жеген шыбын...
Қашанғы қамың болса қара бақыр,
Өлеңге туғаны да заманақыр!..
Тозақтың тоғытпақ па ең қазанына
Қазақтың қара өлеңін балаң оқыр?
Өңінде өрттей қызыл қаны ойнаған
Өлеңім құнсыз десе,
Қалай нанам?!
Апырай, тірі болса,
Бұл сөзіңе
Қалайша қарар еді Абай бабаң?
Замана жаңарғалы, көнергелі
Ақын мен Өлең шіркін не көрмеді?..
Естісе бұл сөзіңді Мұқағали,
Кім білсін,
«Қызталақ...» деп сөгер ме еді.
Өзіңдей бал бөбегін жөргектегі
Көз ілмей талбесікте тербеткелі..,
Бұл Өлең алғаш рет құлағыңа
Анаңның «Əлдиімен» енбеп пе еді?!
Амал не,
Ағайынды баспадағы
Аздырса бақыр қамы, ақша қамы.
Тақпағын аузындағы тартып алсаң,
Балаңа бағаң қанша бақшадағы?!
Тұрғанда астыңда жер,
Төбеңде көк
Өмірге Өлең керек!
Өлең керек!
Атадан қалған асыл мұра болса,
Қалайша қадірі оның төмендемек?
Адамның əлімсақтан азық, əні
Өлмейді!
Өлең əлі жазылады!
Қорламай,
Қолдан келсе қорғау лазым
Бабадан қалған асыл қазынаны!



Пікірлер (0)

Пікір қалдырыңыз

Түрме

  • 0
  • 0

Мен күнде түрмедемін, түрмедемін,
Ұқсайды күзгі күлгін гүлге реңім.
Үміттің Үркеріне иек сүйеп,
Күдіктің үйшігінде күн көремін.

Толық

Қарағым, айналайын, бұраң белiм

  • 0
  • 0

Қарағым, айналайын, бұраң белiм,
Қалайша сенi көрмей тынар көңiл?!
Алыстан ат арытып келгенiмде,
Алдымнан «ағатайлап» шығар ма едiң?

Толық

Жараспаған дəм-тұзы жердегімен

  • 0
  • 0

Жараспаған дəм-тұзы жердегімен,
Жарым көңіл ақынның менде бірі ем.
Қара түннің қойнына еніп кетсем,
Ертегіден аумаған елде жүрем…

Толық

Қарап көріңіз