Мен Құдайдың құлымын, ұлы емеспін

Мен Құдайдың құлымын, ұлы емеспін,
Ұл болуды /құл емес/ тілемес кім?..
Құрсағынан шыққалы жан анамның
Қыр соңынан қалмаймын ұлы Елестің!
Елес қуып келгенмін дүниеге,
Құл ие ме?
Өмірге ұл ие ме?..
Шыбын жаным шыққанша шыңыраудан
Шын иеме – табынам Ұлы иеме!
Жарылқар деп жарлысын құтыменен,
Жаратқанның жарлығын күтіп өлем.
Ақыретте жуылар күнəм менің
Қанмен емес,
Ананың сүтіменен!

---