Жағынбадым, жалынбадым ешкімге – Тұрсынхан Әбдірахманова

Жағынбадым, жалынбадым ешкімге,
Өзімді-өзім бағып сергек өстім де,
Талап, еңбек серік болды жасымнан,
Несібеме риза ғұмыр кештім де.
Қадам сайын құрылған сан бөгетке
Төздім, айтпай тарынып еш наз-өкпе.
Сонда дағы өкшелейді өзімшіл
Атақ, байлық, мода қуған желөкпе.
Ашыққаннан жаман дейді құныққан,
Бұл өңірден саудагер тап мұны ұққан!
Ашқарақтың мол ақша боп арманы
Кейбіреулер адамдығын ұмытқан.
Ал осының ойласаңыз мәнісін,
Саясаткер құрып саудаға әр ісін,
Адамдардың құлқынын да нарықтап,
Өзгерткеннен ізгілікті — ар ісін.