Ұйымдасып, ұғысқалы, ұлт болғалы жарандар

Ұйымдасып, ұғысқалы, ұлт болғалы жарандар,
Көпті бастап ұран тастап, ұйтқы болған адам бар,
Әлмисақтан ел аузында, бұдан халық, хабардар,
Солай бастау алған мынау жер үстінде ғалам бар
Бірін патша, бірін төре, әкім қойып, айдарлап.
Іс өткеріп, бұзып, түзеп келе жатқан қоғам бар.
Алды үміт жетелеген өмір керуен, арты із,
Сол ізбенен ілгері озған бүгін мынау қалпымыз.
Тіршілік тұнжыр көк мұнар басқан бейуақтай,
Кек дөнен көңіл шығатын емес ойнақтай.
Зілмауыр заман зілзала сынды үрейлі,
Өзендей өмір тұрар ма терең бойлатпай!
Мегзелген меже меңіреу дерлік тым алыс.
Адам өмірі жанталас ылғи арпалыс.
Орныққан көңіл, алаңсыз өмір армандай,
Ондайда аяқ баспайды дейсіз кім шалыс.
Түзу жол тауып түзелер ме бұл ел көші!
Алынар ма бұл анық қылмыскердің пердесі!
Жетесіздей-ақ бір оянбай қойды-ау қазақтың
Елім деп соғар жүректе ұлттық зердесі.
Бастыққа кенде емеспіз көп-ақ пысықтар
Ауруды аластап, кеселді емдеп ұшықтар.
Бабалар салған адал жол қалып, ар аттап,
Дегендей бұзды тәп-тәуір әнді пұшықтар.