Өлшем – Гүлжауһар Сейітжан

Өлшемі бар дейді ғой бәрінің де өмірде
сүю менен сыйлаудың, ашу менен наздың да.
Шартты бәрі — адалдық, ізгілік те, сенім де,
бола алмаса егер сай санаң түйген мазмұнға.
Ашу, ыза адамға жарай алмас қорғанға,
ақыл, айла торласа иілер зор күшің де.
Сыйластықтың екі ұшы екі жақта болғанда,
төзім керек тозбайтын шексіз сүю үшін де.
Қырағылық керек-ақ селт етпейтін сәтке де,
қапылыста жоғалтып алмау үшін сенімді.
Кей көңілдер өзгерсе
білесің де гәп неде?!
Неге біреу аңдиды сүрінетін жеріңді?
Біле алмайсың барлығын, сезсең-дағы жобасын —
үндемейсің өр көңіл мәртебесін зор тұтып.
Кейбіреудің ойынан қарап тұрып тоңасың,
кейбіреуді тұрсаң да өрлігіңмен қорқытьш.
Өлшемі бар дейді ғой бәрінің де тірлікте,
сергек қарау керек-ау қараға да, аққа да.
Әйтеуір тек, нысанаң болсын ізгі бір нүкте,
әйтеуір тек, ар менен намыс туын таптама.
Иә, адам көреді ізгіліктен жолдасын
Тек, әйтеуір, арамдық аулақ салсын іргесін.
Адалдығың аяққа тапталатын болмасын,
сеніміңнен сергелдең туып кетіп жүрмесін...