Өлең, жыр, ақындар

Тұсау кесердегі тілек

  • 03.09.2021
  • 0
  • 0
  • 1020
Әні Данияр Аралбаевтікі

Тұсау кесер...
тұсау кесер той бүгін,
еңбектеуге ниет етпе, қой, күнім.
Тәй-тәйіңді алмастырсын жүгіріс,
былдырыңды алмастырсын ойлы үнің.
Тәй-тәй басқан бал бөбегім, балдырған,
күліп шыққан Күнімсің сен алдымнан.
Аймалаған саусақтарың нәп-нәзік
жүрегіме өшпес ізін қалдырған.
Бал тіліңнен көкірегіме жаз қонып,
лебізіңнен жатыр жанға саз толып
Қызықтасақ, көрген сайын қуансақ
Қалтаң-қалтаң жүрісіңе мәз болып.
Сeн бар жерде Күнім де бар, Айым бар,
орманым бар қаптаған тал, қайыңдар.
Қаз-қаз тұрған, құлыншағым, бас енді
тәй-тәй болып, үлкен жолға дайындал.
Думан еткен ата-ананың ордасын
бүгініңнен көріп тұрмын жол басын.
Қолтығыңнан ақ ниеттер демесін,
ұзақ жолда Қызыр баба қолдасын!
Тәй-тәй қозым, аппақ ботам, құлыным,
тәттім менің, бал-шәрбәтім, шырыным
өз өмірін тәй-тәйменен бастаған
бәрі-дағы дүниедегі ұлының.
Мүмкін сен де қазақтың бір мақтаны,
мүмкін сен де ғылымның бір ақ таңы.
Кім болсаң да сүрінтпесін, боташым,
балалық пен есеюдің шақтары.
Жасағанның құлағына жет, тілек,
қуанайық құлынымыз епті деп.
Тұсауыңды кестік бүгін балдырған,
құлдыраңдап шауып кетсін деп тілеп.
Тұсау кесер... тұсау кесер той бүгін,
еңбектеуге ниет етпе, қой, күнім.
Тәй-тәйіңді алмастырсын жүгіріс,
былдырыңды алмастырсын ойлы үнің.
Қайталанбас балғын дәурен шақ мына
бабалардан қалған мәңгі бақ-мұра.
Шаттығыңмен жұпты жазбай, құлыным
жүгір, онда, құлын-тайдай шапқыла...



Пікірлер (0)

Пікір қалдырыңыз

Пендешілік дерті

  • 0
  • 0

«Іштен шыққан шұбар жылан,
Бұл, балам,
Айырылған адамдық нар тұлғадан...
«Ит басына іркіт төккен» бұл күнде,

Толық

Маңғыстауым — мақтаным

  • 0
  • 0

Ғасырлар теңізбен сырласқан,
аймағым сусыған құм басқан.
Күй толған кеудеңе күмбірлеп,
жаныңды жайлаған жыр-дастан.

Толық

Бір шелек картоп

  • 0
  • 0

Ол кезде оқушымыз, мектептеміз -
Дайын кез сан биікке жетпекке біз.
Бастама болса егер бір шырайлы
Бәріміз шығатынбыз беттеп тегіс.

Толық

Қарап көріңіз