Анамның дауысы

Анасының кенже қызы боп еркелейтұғын бұл дауыс,
Әкесі аитқан өлеңді естіп ентелейтұғын бұл дауыс.
Текті бір әулетке ұзатыларда сыңсу да аитқан бұл дауыс,
Әріптеспенен айтысып тойда олжалы қайтқан бұл дауыс.

Сегіз баланы өмірге әкеп әлдиге салған бұл дауыс,
Бір босағасы құлаған шақта хоштасып қалған бұл дауыс.
Оң жақты келін қызартқан кезде сыңғырлай күлген бұл дауыс,
Қыздарын алыс ұзатқан кезде жылай да білген бұл дауыс.

Немерелерін еркелетуден шаршамайтұғын бұл дауыс,
Ұрпағым аман болсын деп іштей қайталайтұғын бұл дауыс.
Кемшілігімді кешіре білген зекірмейтұғын бұл дауыс,
Дүние қанша құбылсадағы ескірмейтұғын бұл дауыс.

Пәниде мынау бірінші болып мені іздейтұғын бұл дауыс,
Баласы үшін шаршап шалдықтым дегізбейтұғын бұл дауыс.
Азанның дауысы сияқты ғажап тең келмес басқа еш мүлде,
Хабарласуға кезекте тұрмын, анамның дауысын естуге!

---