Жиырма жас

Сан арман, сар арпалыс үмітпенен,
Кеудемде мөлдірліктен тұныпты өлең,
Жылғада жүгірген бір бұлақтай боп,
Жиырмаға шықтым, міне, жігітпін мен!
Жиырма жас – жалын жанған жәудір аспан,
Жиырма жас биіктікті, тауды ұнатқан,
Самғайды сұңқардайын сыр көгінде,
Талғайды кең далада таңды да атқан.
Жиырма жас – жібек желдей гүлді үрлеген,
Қос шектей кең далада күмбірлеген.
Жиырма жас тасқа басты соқтырса да,
Кезінде байқатпаған, білдірмеген.
Жиырма жас – тың даладан күш тапқандар,
Жиырма жас – жайдары жаз, сұсты ақпандар.
...Әттең, әттең күш жоқ-ау бұл жалғанда
Жиырма жастың жылдарын ұстап қалар!

---