Осы күні елге барсаң дүлдүл бар

Осы күні елге барсаң дүлдүл бар,
Сағынышын білдірмейді құрғырлар.
Дәмін тосып әлек болған ағаң бар,
Әнін қосып әлек болған құрбың бар.
Атқа демеп мінгізеді бір інің,
Шал тілейді жамағаттың жұрымын.
Қазан жақта қарындасың жүреді,
Қағып тастап қайта-қайта бұрымын.
Жұртың жүрер жайғастырып егісін,
Сылқым жүрер жайнаттырып ел ішін.
Кемпір жүрер дегбір қалмай, дәт қалмай,
Қайта-қайта алмастырып кебісін.
Шаруа шалдар белін буып жатпастай,
Онсыз тегі өмір таңы атпастай.
Ертең олар бұ дүниеден көз жұмса,
Оның қойын басқа біреу бақпастай.
Көрінеді олар маған батырдай,
Көзге көсем, сөзге шешен ақындай.
Ауылдағы семіз қазы, бал қымыз
Аталардың адал махаббатындай.
Бірақ соның сыр-сұхбаты сарқылмай,
Ең соңғы рет ақ алмастай жарқылдай,
Жөнеп жатыр жер бетінен жоғалып
Көзге түсе бермейтұғын алтындай.
Осы күні елге барсаң бұлбұл бар,
Бірақ соны сездірмейді құрғырлар.
Дәмін тосып бәйек болған ағаң бар,
Әнін қосып әлек болған құрбың бар.

---