Серік Тұрғынбеков

Әйел сүйсе

Бұл бетте «Әйел сүйсе» атты Серік Тұрғынбеков жазған әйел туралы өлең берілген. Өлең мәтіні, текст, өлең жолдары және толық нұсқасын осы жерден оқуға болады.

18.09.2021
0
0
940

Таңдайына бал ғана татып тұрған,
Жанарына мұң емес, жақұт тұнған.
Әйел сені сүймесін,
Әйел сүйсе –
Әлемдегі өзіңсің бақытты жан.
Шын тұлпарлар танытпас желісте мін,
Бұл сөзімді шығарар теріске кім?!
Әйел сені сүймесін,
Әйел сүйсе –
Әлемдегі өзісің періштенің.
Шама-мұрша келтірмей суысуға,
Күй толады кеудеңнің қуысында.
Әйел сені сүймесін,
Әйел сүйсе –
Мәңгілікке қалғаның уысында.
Ғашық көңіл малтығып құса-мұңға,
Атың қалып қиссаның мысалында...
Әйел сені сүймесін,
Әйел сүйсе –
Онда сенің өлгенің құшағында.
Мағырыптың қылтиып қырдан күні,
Себелейді сеңгірдің нұр жаңбыры...
Әйел сені сүймесін,
Әйел сүйсе –
Махаббаттың
Сен адал құрбандығы!

Серік Тұрғынбеков әйел сүйсе... Серік Тұрғынбеков өлеңдері

Пікірлер (0)

Пікір қалдырыңыз

Жиі қойылатын сұрақтар