Сені көргім келеді

Сені көргім келеді –
Сені көргім,
Сенің ғана келеді соңыңа ергім
Бір көруге зар болып,
Кім біледі –
Әлі талай жылармын, еңірермін.
Сені көргім келеді –
Тағат қалмай,
Сағындырған, сарсылтқан сағаттардай.
Сенен мені қызғанып,
Көрмей қалсам –
Жүрегіме әлдекім оқ атқандай.
Сені көргім келеді –
Себебі не?!
Құмар болған торғайдай көк егінге,
Періп кетсем қарамай отқа-суға
Періште боп сен ылғи жебедің бе?!
Сені көргім келеді – тағы, тағы!
Ақ тілегін ақ көңіл ағытады.
Әлдебіреу қосуға құштар болып,
Әлдебіреу сыртымнан қағытады.
Сені көргім келеді –
Іздеп келіп,
Құзар шыңдар тұрса да мұз бөктеріп,
Қолың,
Көзің,
Аршын төс,
Ақ балтырың,
Көз алдымнан өтеді тізбектеліп.
Сені көргім келеді –
Түн ішінде,
(Еркіндесін ер жігіт тірісінде).
Ақ жүзіңді ардақтап сипаттауға,
Алтының да тең келмес, күмісің де!
Сені көргім келеді –
Құмар қанбай,
Айтылмаған жүректе бір ән бардай.
Ашық күнде айрылған серігінен
Мен өзімді сеземін сыңар жандай.
Сені көргім келеді –
Сенесің бе?
Көз алдымнан кетпейді елесің де.
Калып қойған секілді қайғы-мұңым
Қайырлаған Аралдың кемесінде.
Сені көргім келеді –
Бір-ақ рет!
Бір-ақ рет – өмірдің сұрағы көп.
Тарықтырып қоятын, зарықтырып
Тағдырыма налимын тұрағы жоқ.
Сені көргім келеді –
Тербел, гүлім,
Асығамын жетуге елден бұрын.
Көре алмасам қайтемін,
Көрмегенім,
Көрмегенім – ол менің өлген күнім.

---