Алаяққа

Бұл бетте «Алаяққа» атты Несіпбек Айтұлы жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

  • 22.09.2021
  • 0
  • 0
  • 737
(Абай ізімен)

Сол шіркін өзін қор деп санамайды,
Дүниеге түзу көзбен қарамайды.
Отырар ала қойды бөле қырқып,
Аядай ауыл-үйді алалайды.
Жерлесшіл-ақ, жікшіл-ақ, рушыл-ақ,
Тыныш жүрмес, пыш-пыштап, жыбыршылап.
Өндіргені жерде де, көкте де жоқ,
Бірін сыбар, өзгенің бірін сынап.
Мансаптыны маңайлап танысқыш-ақ,
Жағаласып жақсымен алысқыш-ақ.
Бірді алдап, бірді арбап, бірді қармап,
Шылбырдан ап, тізгінге жабысқыш-ақ.
Сөзі көпшіл келеді, ойы кекшіл,
Саудасын жүргізуге тым-ақ епшіл.
Диірменге тартсаң да бүтін шығар,
Өсегі, есебі көп, әрекетшіл.
Көлкектейді күштіге жалпылдап-ақ,
Айтақтаса аянбай арсылдамақ.
Сәлем бермес сен түгіл әкесіне,
Мансабы өссе, танытар салқын қабақ.
Болмаса да бойында бір өнері,
Жерді тесіп кетердей шіренеді.
Алдыңды орап, ор қазар алаяқтың,
Қу ермесе, қасына кім ереді?..

1975


Пікірлер (0)

Пікір қалдырыңыз

Жиі қойылатын сұрақтар

Алаяққа өлеңінің авторы кім?

Несіпбек Айтұлы — осы өлеңнің авторы.

Алаяққа өлеңінің толық мәтінін қайдан оқуға болады?

Бұл бетте өлеңнің толық мәтінін және текст нұсқасын онлайн оқуға болады.

Алаяққа өлеңі не туралы?

Бұл өлеңде Несіпбек Айтұлы өз ойы мен сезімін көркем түрде жеткізеді.

Алаяққа өлеңінен үзінді бар ма?

Бұл бетте өлеңнің толық мәтіні, шумақтары және өлең жолдары ұсынылған.

Осы автордың басқа өлеңдері