Сен кеткенде

Есіңде ме жазғы таң ауылдағы,
Ерке бұлақ жүгірген бауырдағы.
Ауылыңнан алысқа сен кеткенде,
Аласұрдым толқындай дауылдағы.

Қайырмасы:
Сағындырған сайран көл, салқын сазың,
Қала берді қол бұлғап жарқын жазың.
Қанатыңнан қайырылсаң, бар ма лажым,
Қоңыр қазым,
Саған айтпай кімге айтам көңіл назын,
Қоңыр қазым?!

Бауыр басып мекенге шалғайдағы,
Шөліркеттің тамшыдай таңдайдағы.
Таптырмайды жер-көктен іздегенің,
Бақ жұлдызың жанбаса маңдайдағы.

Қайырмасы.