Ел шетінде ақ қайың

Ел шетінде ақ қайың,
Көзге ыстық асыл арайлым.
Кездескен біздер сәт сайын
Ізетпен саған қараймын.
Тұрасың таныс адамдай,
Жасыл бешпент жамылып.
Жол тосып жүрген анамдай,
Келер деп мені сағынып.
Ізімді басқан санайтын,
Көрші қыз балғын шағынан.
Қасыңнан маған қарайтын
Ажарын аппақ сағынам.
Жасыл жапырақ сыбдыры
Сол қыздың ғашық сөзіндей.
Сығалап түскен күн нұры
Жарқ еткен мөлдір көзіндей.
Бұрылған саған ескі жол
Кіреді жиі түсіме.
Ақ бұтағың берді қол
Кездескен үлкен­кішіге.
Аппақ тәнің мамыр ма,
Бір сипау дертті емдеген.
Киелі күш бар тамырда,
Жалғаған сені жерменен.
Көп толқытқан ойымда,
Сырымды шертіп тамсанам:
Құштарлық бар бойыңда
Біз аңсап, бізді аңсаған.

---