Батыр қызға – Қанипа Бұғыбаева

Жер жүрегін жүрекпен тыңдап алып,
Емін-еркін жуынып, күнге жарық.
Жеңіс күнге арнап көп гүлдер тердім,
Мен сен үшін, Әлия, қырға барып.
Үстіндесің даңқты дара жолдың,
Ертегідей көрінер маған ол күн.
Жақсы өмірде жар сүйіп, сәби сүйіп –
Мен сен үшін, Әлия, ана болдым.
Ұясындай осынау көңіл сырдың,
Өтіндемін ерліктің, не бір сынның.
Тыныштықты күзетіп, күреспенен
Мен сен үшін, Әлия, өмір сүрдім.
Басын иген аяққа қарсы жауың,
Қызыл гүлге айналып тамшы қаның.
Мынау айдай әлемге Роза болып,
Мен сен үшін, Әлия, ән шырқадым.
Көкірегіңнен жеріңе атқан ақ таң,
Сені өлім жоқ әлі де жалт қаратқан.
Дұшпандардан қорғап ел, Отаныңды,
Сен мен үшін оқ аттың автоматтан.
Нұрын төгіп ұрпаққа күлсін деп күн,
Қорғап жерді, жүректі дүрсілдеттің.
Гүл ұстайтын қолыңмен қару ұстап,
Сен мен үшін, Әлия, қыршын кеттің.
Қараймын да өмірге, күнге тегін,
Күйге толып көңілім, гүл мекенім.
Ерлік жайлы ұрпаққа айтқым келсе,
Мен өзіңді, Әлия, үлгі етемін.
Күтуде әлі, күтуде аяулы анаң,
Жапырағын бауырында жая алмаған.
Сен мен үшін қапыда қалғып кеттің,
Енді, Әлия, сен үшін ояу болам.
Жеңістен соң дүние бір дем алып,
Ерлік жайлы, ел жайлы сырға қанып.
Бейбіт күнге арнап көп гүлдер тердім,
Мен сен үшін, Әлия, қырға барып!