Көңілдің орындалмай көп тілегі

Көңілдің орындалмай көп тілегі,
Кеудемді құлын жүрек тепкіледі.
Бейғам ем, бетпе-бет кеп ойда жоқта,
Көзіңнің найзағайы соқты мені!..
Білмеймін мен бе, сен бе, кім кінәлі,
Тартпайды бұрынғыдай бұлбұл әні.
Шағылған сезімімнің әйнектерін
Өзіңсіз құрай алмай жүрмін әлі.
Көзіме дөңгелетіп бар әлемді,
Өткір бір көкірегіме алау енді.
Көзіңнің сол қарасы, қуғыншыдай
Тыншымды қайда барсам ала берді.