Күндерменен ақ сағым сырғанармын – Қанипа Бұғыбаева

Күндерменен ақ сағым сырғанармын,
Сырғанармын, сол күнмен бір жанармын.
Елеңдетіп жанымды түнгі көктен,
Даусы келер құлаққа тырналардың.
Құстар әні келеді түнгі көктен,
Күткен едім осынау үнді көптен.
Бұл дауысты жанымнан сезбегелі
Қанша уақыт дариғай, жылжып өткен.
Осы емес пе көңілдің от тілегі,
Үміт, арман үн болып көк тіледі.
Түнгі көктен естілген талып қана
Құстар әні оятып кетті мені...
Бей уақытта ұшқан-ау күндіз қалып,
Ұшпай біз де осылай жүрміз нағып.
Тізіп моншақ қатары бара ма екен,
Түнгі көкке қанаты жұлдыз қағып...
Сағынып ем осынау үнді көптен,
Бір жүрекке жол тартқан бір жүректен.
Тырналардың дауысы талып маған
Естілгендей болады түнгі көктен...