Қазақтан арыз

Топырағыңнан күреп алып әлдекім,
делдал болып айырбастап «өтелге»,
арсыздықпен тасып жатса шет елге...
өз жерімде өндірілген қорғасын
баз-біреудің қолындағы қару боп
мені көздеп атылмасын түбінде,
«импорт оқтан» құдай өзі қорғасын.
Перизаттың бойындағы от-алау
жат пиғылдан алмасыншы бағасын.
Құлагердің тасқа шапса мұқалмас
Қытай соғып бермесінші, тағасын.
Тілін ұғып, иманға ұйып үлгіртпей
шет елдерде оқытпасын баласын.
Жат бір-бірін сыйламаса - таласын,
іні алмасын жағасынан ағасын.
Күндеушінің тіл мен сұғы өтпесін,
жәудір көзден жас тамшылап жетімдер,
көлгірлердің жетегінде кетпесін.
Хас сұлуың доллар іздеп, тән сәтып,
боздақтарға жаудырмасын өкпесін.
Жалбарынам тәңіріме: осылар
ескерілмей, жалаң үкім кеспесін...