Дедің бе екен?

Алма-кезек дүние
салтын ұқсын дедің бе?
Алды-артыңды бағамда,
жарты міскін, дедің бе?
Жыласын да жұбанып,
қайта күлсін дедің бе?
Иманыңа саламат
айта жүрсін дедің бе?
Тірлігінде жан-жағын
парықтасын дедің бе?
Жақсылықтың өзінен
жалықпасын дедің бе?
Қайғыны да әл барда
көтере алсын дедің бе?
Құбыласын танысын,
Төте барсын дедің бе!
Ерте кеттің жарқыным,
ерте кеттің шуақты!
Бұлт бүркеген сұр аспан
нөсерімен жоқтасып,
жасынымен ұшықтап,
күкірімен жұбатты!