Күз келгенде құс іздеп әнші бақтан

Күз келгенде құс іздеп әнші бақтан,
Жүрегіме қып-қызыл тамшы қатқан.
Жайсаң жазым соңына бұрылмады,
Ернеуінен үзілтіп бал шұбатқан.
Жан досым-ай, жайымды білші ғаріп,
Ән айта алмай қойдым мен үн шығарып.
Сылдыр-сылдыр еткенге тайыз десем,
Тұңғиыққа әкетті тылсым ағып.
Суық жаңбыр бетіме бүркіп менің,
Ашқызбады жанымның кірпіктерін.
Белдеудегі күреңді босатар ем,
Жолатпады жанына үркіп керім.