Қария айтқан бір сөз бар арлы ұғымда – Шәмшия Жұбатова

Қария айтқан бір сөз бар арлы ұғымда,
Сексеуілді сындырмас қарлы құмда.
Жүрек құрғыр саңқылдап сөйлеп кетсе,
Дауыстаймыз, болмайды қарлығуға.
Мен ұмытқым келеді көп нәрсені,
Бастау үшін қайтадан барлығын да.
Шіркін, мезгіл! Шектеме сынабыңды,
Қылышыңды, қоя тұр қынабыңды.
Жібек желге жалауы желбіреген,
Мен қайтара алмаймын мына күнді.
Сулар біткен сусыды әкетем деп,
Жылымық күн жеткізген жылы ағынды.
Қария күн басында ақ дағара,
Ұқсамайды даналық қап-қараға.
Шежіре жыл шешуін жаза білсең,
Ақ көңілмен түйткілін ақтара ма?
Шымшықтардың шырылы шаршатты ма,
Бұлбұл әнін күтеді бақтар ана.