Жапырақ дүние – Гүлнәр Шәмшиева

Жапырақ-дүние – ұшып та бір күн кетерсің,
Бір күні – у-сың, бір күні – тәтті шекерсің!
Жан біткеннің дүниеден бәрі өтер шын,
Жапырақ дүние – ұшып та бір күн кетерсің!

Көл бола алдың ба, - шомылып алар, бал құрақ,
Жар бола алдың ба – қырандар қонар, албырап?
Пасық боп өтсең – өмір сүргенің сандырақ,
Жапырақ- дүние – ұшып та бір күн кетерсің!

Жүрекке зәмзәм ұсына алмасаң – не тірлік,
Махаббатымды жоғары жаққа көпір қып.
Жалғанда мынау – жетім боп жүріп, жетілдік,
Жапырақ дүние – ұшып та бір күн кетерсің!

Құр ішіп, жеумен, қарын тойғызып, аттансаң –
Жәһәннам тартар – тәкәппар, залым боп қалсаң!
Жәннәт тартатын – періште халге тоқтал, сен,
Жапырақ дүние – ұшып та бір күн кетерсің!

Намазың жоқ па? Өкпең қысылар – ол жақта,
Шапағат сұра – Расулға с.ғ.с. пірге жалтақта!
Ашылсын бізге – жәннәтқа апарар сол қақпа,
Жапырақ дүние – ұшып та бір күн кетерсің!